Nukissiornermut, Silap pissusianut Nunalerinermullu allaffimmi pisortaq

Nukissiornermut, silap pissusianut nunalerinermullu allaffimmi pisortaq

Ulloq atorfiniffissaq: Pilertornerpaamik.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Nunalerinermut, Nukissiutinut Silallu Pissusianut Immikkoortortaqarfiup allaffiani pisortassamik akisussaassusilimmik suleqatigiinnermillu pingaartitsisumik pissarsiorpoq.

Atorfik pillugu

Nukissiutinut, silap pissusiani nunalerinermilu suliassaqarfiup iluani sulisut suleqatillu pikkorissut suleqatigalugit oqartussaasutut ineriartortitsinermilu suliassat akisussaaffigissavatit. Nunalerinermut, Nukissiutinut Silallu Pissusianut Immikkoortortaqarfimmi pisortaq qullersarissavat.

Immikkoortortaqarfiup allaffiani pisortatut suliassanut assigiinngitsunut arlalinnut, immikkoortortaqarfimmi isumagineqartussanut akisussaaffimmik tunineqassaatit. Suliassat immikkoortortaqarfimmi pisortaq suleqatigalugu, aammalu illit piginnaaneqarfitit soqutigisatillu malillugit agguarneqarnissaat aaqqissuunneqartassapput.

Pingaarnertut akisussaaffeqarfiit annerusut, ukiuni tulliuttuni immikkoortortaqarfimmi isumagineqartussat ukuupput:

• Parisimi isumaqatigiissummut ilaalernissamut isumaqatigiissummik atuutsitsilernissaq, tassanilu nunami namminermi silap pissusianut periusissiassap, Kalaallit Nunaata siunissami suliassaqarfinni gassinik silaannarmik kissakkiartortitsisunik aniatitsinermik annikillisitsiniarluni suliniutissaanut sinaakkusiisussap, kiisalu mingutsitsinngitsunik allannguinissamut aqqutissiuussisussap, taamatullu Kalaallit Nunaata COP-nut ilaalernissaanik qulakkeerisussap suliarineqarnissaa ilaatinneqarpoq. Tassani annerusumik Naalakkersuisoqarfiup iluani avataanilu, kiisalu kommunini, innuttaasuni, suliffeqarfinni nunanilu allani piginnaaneqarfiit isumalluutillu akimorlugit suliniutissanik ataqatigiissaarinerit suliarineqassapput.

• Immikkoortortaqarfiup aningaasaataanik, EU-p aamma Kalaallit Nunaata akornanni Grøn Vækst-imut isumaqatigiissutaanniit pissarsiarineqartunik atuutsitsilertarneq, tassanilu pingaartumik mingutsitsinngitsunut allannguinissamut immikkoortortaqarfimmi nunami namminermi silap pissusianut periusissiamut attuumassutilinnik pilersaarusiornissaq, kiisalu Power-to-X-inik misileraanissamut aammalu nunalerisunut erngup nukinganik innaallagissiornermik misileraanermi inerisaanissamut pilersaarusiat suliarineqassapput.

• Kalaallit Nunaanni erngup nukinganut isumalluutit annersaasa, niuernermik tunngaveqarluni atuinissaq siunertaralugu, aammalu nunami arlalinnik aallaavilinnik aningaasaqarnerup anguneqarnissaa siunnerfigalugu nunami namminermi nunanilu tamalaani aningaasaleerusuttunut neqerooruteqartitsinermut atatillugu oqartussaasutut suliassanik suliaqarneq. Oqartussaasutut sullissinerit aamma EU-p aamma Kalaallit Nunaata akornanni Grøn Vækst-imut isumaqatigiissummiit aningaasaliissutit atorlugit tapersersorneqarput.

• Kalaallit Nunaanni erngup nukinganut sanaartornerit pillugit inatsisip, pisortat pilersuinerannut atorneqartussap atuutsinneqalernissaanut atatillugu oqartussaasutut suliaqarnerit.

• Nukissiorfinni nukissiamik pilersuinermut atatillugu oqartussaasutut suliassat, kiisalu immikkoortortaqarfimmi oqartussaasutut suliassat allat.

• Nunalerinermut atatillugu oqartussaasutut suliassat, kiisalu immikkoortorta-qarfimmi oqartussaasutut suliassat allat.

Nunalerinermut, Nukissiutinut Silallu Pissusianut Immikkoortortaqarfimmi atorfiit maannarpiaq 8,5-iupput, taakkulu saniatigut ilaatigut EU-p aamma Kalaallit Nunaata akornanni Grøn Vækst-imut isumaqatigiissutip ataani atorfinitsitsigallarnernut saniatigut aningaasaliissutit arlallit ilaatinneqarput.

Ulluinnarni immikkoortortaqarfimmi sulisunut pisortatut suliassanut attuumassutillit arlallit akisussaaffigissavatit, soorlu:

• Suliassanut tunngatillugu aalajangiinerit.

• Suliassaqarfinni aalajangersimasuni anguniakkanut iliuusissanullu pilersaarutinik malinnaaneq.

• Immikkoortortaqarfimmi sulisussarsiornerit, tassunga ilanngullugu malittarisassat atuuttut naapertorlugit atorfinnik inuttassarsiuussinermi allagarsiisarnernut saqqummiussisarnernullu akisussaaffeqarneq.

• Sulisunut atorfinerlaanut ilisarititsinissamut pilersaarutinik suliaqartarneq naammassinnittarnerlu.

• Atorfinitsitsinissamut atatillugu oqaloqatiginnittarnerit, sulisunik ingerlaavartumik oqaloqatiginnittarnerit, piffissanik suliffissanik akuersisarnerit, sulinngiffissanik akuersisarnerit.

• Missingersuutinut malinnaaneq qulakkeerisarnerlu.

Nunalerinermut, Nukissiutinut Silallu Pissusianut Immikkoortortaqarfimmi pisortaq qanillugu suleqatigissavat, tassanilu aamma suleqataaffigissavatit:

• Suliassaqarfinni aammalu immikkoortortaqarfimmi tamakkiisumi anguniagassanut iliuusissanullu pilersaarutinik suliaqarneq.

• Suliassanut immikkut ittunut suliassaqarfimmullu attuumassutilinni sulisussanik sulisussarsiortarneq aallartitsisarnerlu, kiisalu ataqatigiissaakkamik pilersaarusiornikkut piginnaanngorsaanissat pisariaqartut.

• Sulisut toqqissisimanissaat aammalu inuttut suliatigullu ineriartornissaat siunnerfigalugit sullivimmi avatangiisinik peqqinnartunik pilersitsinissamut akisussaaqataaneq.

Naalakkersuisoqarfimmi pisortanit annertuumik toqqissisimanissamut nukittorsaanissaq allanngutsaaliuinissarlu pingaartinneqarput. Taamaattumik Naalakkersuisoqarfimmi toqqissisimanissamut ineriartortitsinissamullu suleqataassaatit. Sulisunut isumassarsiuisinnaassaatit, kaammattuisinnaassaatit, akisussaaqataatitsilersinnaassaatit, suliakkersuisinnaassaatit, kiisalu pilersitsiviusunik utertitsinissaannik isumaginninnissaq pikkoriffigissavat, aammalu immikkoortortaqarfimmi angusat atorsinnaasut, patajaatsut ersarissullu pilersinneqarsinnaanissaat pingaartissavat.

Piginnaaneqarfiit

Ingerlaqqiffiusumik ilinniagaqarputit ukiunilu arlalinni pisortat namminersortulluunniit suliffeqarfianni atorfeqarlutit allaffissornikkut misilittagaqarlutit. Suliatigut piginnaaneqarluarnissaq pingaaruteqarpoq, taamaattumillu nukissiornermi silallu pissusiani suliassaqarfinni suliatigut nukittuumik inissisimanissat pingaaruteqarpoq.

Naatsorsuutigaarput:

• Pisortatut misilittagaqassasutit, aammalu pisortatut piginnaaneqarlutit suleqatigiinnermi tatigeqatigiiffiusumi tulleriiaarisinnaaneq suliakkersuisinnaanerlu piginnaaneqarfigissagit

• Akisussaaffimmik tigusisinnaaneq iluarisimaassagit, aammalu kaammattuiffiusumik akisussaaffinnik allanik agguaasinnaassasutit

• Ataqatigiissinnaanermut nukittuujussaatit, taamaalilluni allaffik pilersitsiviusumik, toqqissisimanermut anguniagaqarnermullu aqutsinerit oqimaaqatigiiffigisaannik aqunneqarsinnaassammat

• Naalakkersuinikkut aalajangigassat ingerlasarnerinik misilittagaqassasutit paasisimaarinnissasutillu

• Avatangiisit paasisimaarissagitit, aammalu sullissisunik avataaneersunik assigiinngitsorpassuarnik, akerleriinnik soqutigisaqarsinnaasunik tatiginartumik torersumillu suleqateqarsinnaassasutit

• Pitsaasumik ingerlatitseqqinnissamut piginnaaneqarluassasutit, pingaartumik kalaallisut, tuluttut danskisullu

• Kalaallit malitaat malillugit aammalu nunanut tamalaanut atatillugu nukissiornermi silallu pissusiani suliassaqarfinni suliassanik suliaqarnissamut soqutiginnissasutit suliassanillu ilisimaarinnissasutit

• Kisitsisilerineq nukittuffigissagit naatsorsukkanillu assigiinngitsunik suliaqarsinnaassasutit

• Ulluinnarni nikerartunik suliaqarfiusuni ulapaarfiusunilu sulineq nuannarissagit, aammalu suliassanik, ullup ingerlanerani ineriartortartunik ingerlaavartumik tulleriiaarisinnaaneq piginnaaneqarfigissagit. Pilersaarusiorsinnaaneq ilisimaarissavat, aammalu allat taamatut suliaqarnissaannut paasisimaarinnissaatit ikiuussinnaassallutillu.

• Piffissanik malinninnissap qulakkeernissaanut eqqissisimasinnaanerlu piginnaaneqarfigissavatit

• Immikkoortortaqarfiup angusaanik tigusisussat sungiussisimalluartunik pitsaasunillu suliaqartoqarsimanerinik misiginissaat pingaartissavaat.

Neqeroorutigaavut

• Akisussaaffik annertooq, taamatullu pitsaasunik allannguinissamut periarfissaqarneq

• Pisortatut atorfik pissanganartoq, aqutsinikkut ineriartornissamut periarfissaqarluartoq

• Pisortaaqatigiit ingerlalluartut, qanittumik tatiginniffiusumillu suleqatigiinnissamik pingaartitsisut

• Suliffeqarfik pingaartorsiorfiunngitsoq pilerinartoq, ataqqinniffiusumik tatiginniffiusumillu silaannalik

• Suliassaqarfik tamatigoortoq pissanganartorlu, nunap iluani nunarsuarmilu suliassanik annertuumik aallussiffiusoq

Annertunerusumik paasisaqarusuppit?

Atorfik pillugu annertunerusumik paasisaqarusunnermi immikkoortortami pisortaq Ane Wraae Nielsen tlf. +299 58 67 89-imut, e-mail: awni@nanoq.gl aqqutigalugu attaveqarfigineqassaaq.

Qinnuteqarnissamut killissarititaq

Qinnuteqaat CV-mik aammalu soraarummeernermut uppernarsaatit assilinerinik ilaqartillugu kingusinnerpaamik septemberip aappaani 2024-mi linki matuma kingulianiittoq aqqutigalugu nassiunneqassaaq. Qinnuteqaatinik e-mail-ikkut tigusineq ajorpugut. Piaarnerpaamik atorfinitsitsisoqassaaq.

Akissarsiat atorfeqarnermilu atugassarititaasut

Atorfik maannarpiaq akissaateqarfiup LR 36-ip qaffaseqataani inissisimavoq.

Akissarsiani (LR36)-imi akissarsianut immikkoortut allajangersimasut imatut isikkoqarput: 1. April 2022-imi qaammammut 50.291 koruunit aamma ukiumut 603.496 koruunit.

Tunngaviusumik isumaqatigiissutit tunngavigalugit atorfinitsitsisoqassaaq, tassalu qinnuteqartut Kalaallit Nunaanni pisortani tjenestemanditut atorfillit pillugit inatsisit naapertorlugit tjenestemanditut atorfeqareersut, tjenestemandinut atugassarititaasut tunngavigalugit atorfinitsinneqarsinnaapput.

Akissarsiat atorfeqarnermilu atugassarititaasut, tassungalu ilanngullugit atorfininnermut soraarnermullu atatillugu angalanernut pequtinillu nassiussinermut akiliunneqarnissamut pisinnaatitaaffeqarneq, atorfininnermi Namminersorlutik Oqartussat kattuffiullu isumaqatiginninniarsinnaatitaasup ilaasortaaffigisap akornani isumaqatigiissut atuuttoq naapertorlugu pissapput.

Naalagaaffimmi tjenestemandit aamma AC-mut isumaqatigiissutit arlallit, ilaatigullu DJØF-ip aamma Aningaasaqarnermut Ministereqarfiup akornani isumaqatigiissut malillugit atorfeqartinneqartut, Namminersorlutik Oqartussani atorfeqarnerminnut atatillugu akissarsiaqaratik sulinngiffeqarsinnaatitaapput. Aamma Nunamut Namminermut Ministereqarfik kommuninut nunallu immikkoortuinut inassuteqarpoq, Namminersorlutik Oqartussani atorfeqarnermut atatillugu akissarsiaqarani sulinngiffeqarnissamut qinnuteqartunut akuersaaqqullugit. Sulinngiffeqarnermut aalajangersakkanut aamma Namminersorlutik Oqartussani atorfinittunut aappaasut/inooqataasut ilaatinneqarput.

Piffissaq suliffiusoq tunngaviusumik sapaatit akunneranut nal. ak. 40-nik sivisussuseqarpoq, aammalu atorfeqarnermut atatillugu ukiumut 320-t ukiup sisamararterutaanut 80-t piareersimasussaatitaaneq atuutsinneqarpoq, aammalu ullunut sulinngiffeqarfinnut annaasanut ajunngitsorsiat pillugit aalajangersakkat atuutsinneqanngillat.

Inissiaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk