Nunaminertanut Illuliornermullu Oqartussaqarfimmi sulianik sullissisut marluk

Kommuneqarfik Sermersuumi Nunaminertanut Illuliornermullu Oqartussaqarfimmi sullissinermi sulisussanik marlunnik pissarsiorpugut. Nunaminertanut Illuliornermullu immikkoortortaqarfik, sanarfinermut avatagiisinullu ingerlatsiviup iluani aaqqissussaanermi, “Pilersaarusiorneq oqartussaqarfiillu” ataani inissisimavoq immikkoortortat allat peqatigalugit makku, illoqarfimmi pilersaarusiortartut, nakkutilliisullu.

Sanaartukkanut oqartussaqarfiup suliarai :

·Nunaminertanut Illuliornermilu malittarisassat atuuttut naapertorlugit sanaartukkanut tunngassuteqartunik sullissineq

·Inatsisinut qinnuteqarnermullu tunngasunik innuttaasunik ilitsersuineq sullissinerlu

·Nunaminertalerinermi Sanaartukkanullu tunngassuteqartunik nakkutilliineq

·Najukkat nalunaarsorneqarnerinut oqartussaaffik

Sulisussaq ujagarput:

Naatsorsuutigivarput sanaartornermut tunngassuteqartumik ilinniarsimasutut tunuliaqutaqartutit. ( Ingeniøri, Illussanik titartaasartoq, Bygningskonstruktør imaluunniit assigusumik.)

·Allakkatigut oqalunnikkulu paasinarluartumik oqariartuuteqarnissamut piginnaaneqarnissaq, kalaallisut qallunaatullu pisinnaaguit iluaqutaassaaq.

·Suliassat unamminarsinnaagaluartut ilusilersorluarlugit tunniusimallutillu suliarisinnaassavatit

·Suliaq tamarmiulluni ilusia ukkataralugu naammassinnissinnaassaatit

·Innuttaasut suleqatillu sullisserpalaartumik ammasumik sapiissuseqarlutit oqaloqatigisinnaaneri

·Susassaqarfiit, isummallu allat ataqqillugit suleqataaffigisinnaanerat pingaartissavat

Aaqqissuussaanikkut politikkikkut aqunneqartumik, kiisalu sanaartukkanut tunngassutilimmik sullissisutut sulineq misilittangaqarfigigukku iluaqutaassaaq. Biilernermut allagartaqaruit amma iluaqutaassaaq.

Ilinnut neqeroorutigisinnaavagut:

·Suliffik soqutiginartoq, assigiinngiiaartunik namminersorluni piginnaasatigut ingerlatsineq, akisussaaffeqarnermik nassataqartoq

·Pikkorissunik aamma tunniusimalluartunik suleqateqarneq

·Suliatigut inuttullu ineriartornissamut periarfissat pitsaasut

Pineqaatissinneqarsimannginnermut uppernarsaat: 

Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.

Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami aqutsisoq Tittus Johan Dalager, oqarasuaat +299 36 74 41, mobil: +299 55 07 38 imaluunniit e-mail: tjda@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 443-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: maajip 20.-at, 2025

Atorfik una qinnuteqarfigiuk