Nuummi Inuusuttunik Sullissivik inuusuttunut siunnersortinik marlunnik pissarsiorpoq

Kommuneqarfik Sermersooq – Nuummi Inuusuttunik Sullissivik Suliniuteqareernerup kingorna inuusuttunut siunnersortinik marlunnik pissarsiorpoq

Atorfiniffissaq Piaartumik isumaqatigiissuteqarnikkulluunniit

Suliffiup sumi inissisimanera: Inuusuttunik Sullissivik Nuuk

Inuusuttunik Sullissivimmi Suliniuteqareernermi malinnaaviginninnermi immikkoortortaq

Suliniuteqareernermi malinnaaviginninnermut immikkoortortaq Nuummi Inuusuttunik Sullissivimmut ilaavoq, inuusuttut meeraanermik inersimasunngulernermi ikaarsaariarnerini toqqissisimasumik, nalerisimanermik aamma ineriartornermi pilersitsinissaq sulissutigineqartarluni. Suliniuteqareernermi malinnaaviginninnermi inuusuttut 18–23-nik ukiullit, meeraanerminni ikorfartorneqareernerisa kingornatigut nammineersinnaalernissaannut, ataqatigiissumik ingerlanissaannut aamma ulluinnaat aalajaatsuunissaannut immikkut ikorfartorneqarnissamik pisariaqartitsisunik ikorfartuisoqartarpoq.

Suliniuteqareernermi malinnaaviginninnermi Inuusuttunut siunnersortitut suleqatigiinnut tunniusimasunut assigiinngitsunillu sulialinnut ilanngutissaatit, taakkunani attaveqatigiinnerit, qanilaarneq ineriartornerlu pingaartinneqarlutik.

Pingaarnertut suliassatit:

∙Inuusuttut suliniuteqareernermi malinnaavigineqarneranni (18–23-nik ukiullit) suleqataaneq, oqartussaqarfimmi sullissisoq qanimut suleqatigalugu

∙Inuusuttoq peqatigalugu anguniakkanik ineriartornissamullu pilersaarutinik suliaqarneq malinnaaffiginninnerlu

∙Ilinniagaqarnissamut, sulinissamut, ineqarnissamut aamma inooqataanikkut attaveqarfeqarnissamut atatillugu inuusuttumut ikorfartuineq aqqutissiuussinerlu

∙Sammisassanik ataatsimoornermik, akisussaaffeqarnermik aamma nammineersinnaanermik nukittorsaasunik pilersaarusiorneq naammassinninnerlu

∙Inuusuttunut ulluinnarnik ataqatigiilersitsineq ass. inuusuttut inaanni sulineq imaluunniit sammisassanik pilersaarusiorneq aqqutigalugu sulinikkut

∙Oqartussaqarfimmi sulianik sullissisumut qaammatit pingasukkaarlugit killiffimmut nalunaarusiornerit aamma uppernarsaasiornerit

∙Assigiinngitsunik suliaqartut ataatsimiinnerini peqataaneq aamma suleqatigisanik attuumassutilinnik soorlu atuarfinnik, ilinniarfinnik aammalu suliffeqarfinnik suleqateqarneq

∙Sulisut ataatsimiinneranni, pilersaarusiorluni ataatsimiinnerni aamma suliaq pillugu ataatsimiinnerni peqataaneq

∙Suliniuteqareernerup kingornatigut malinnaaviginninnermi neqeroorutinut aamma Inuusuttunik sullissivimmi suliniutinut allanut suleqataaneq

Illit suleqatissarput

∙Perorsaanermik imaluunniit isumaginninnermik ass. perorsaasoq, isumaginninnermi siunnersorti, ilinniartitsisoq assigisaannilluunniit ilinniagaqartutit. - Kisianni piumasaqaataanngilaq – inuusuttunik assingusumik misilittagaqaruit imaluunniit isumaginninnermi sulinermik pisortatigoortumik ilinniagaqanngikkaluarlutit aamma qinnuteqarsinnaavutit

∙Sullarissuuvutit aamma inuusuttut peqatigalugit illup iluani silamilu sammisaqallaqqipputit

∙Ass. qajartoqatigiinnermut, sikkilernermut, pisuttuarnermut, nerisassiornermut, piniariarnermut, aalisarnermut aamma pinngortitami allanik sammisassarsiornermut piumassuseqassaatit piginnaaneqarlutillu

∙Inuusuttunik immikkut ittunik unammilligassalinnik aamma inersimasunngulernermi ikaarsaariarnermi ikorfartorneqarnissamut pisariaqartitsisunik misilittagalik

∙Misiginneqatiginnissinnaasoq, aalajaatsoq, akisussaaffilik aamma tatiginninnermik pilersitsisinnaasoq

∙Namminersortumik suleqatigiinnilu sulisinnaassusilik

∙Pilersaarusiorsinnaasoq, uppernarsaasinnaasoq aamma suliniutinik malinnaaffiginnissinnaasoq

∙Piffissaq suliffimmut sulianullu tunngatillugu naleqqussarsinnaassusilik

∙Kalaallisut danskisullu allattariarsornikkut oqalunnikkullu pitsaasumik attaveqarsinnaasoq

∙Inuusuttunik inooqataanikkut, tarnikkut imaluunniit ilaqutariinni unammilligassalinnut tunngatillugu ilisimasalik paasinnissinnaassusilillu

Neqeroorutigaavut

∙Atorfik isumaqarluartoq allanngorartorlu illumi ineriartorfiusumi

∙Sullivimmi avatangiisit suleqatigiinnermik, suliatigut isumasiueqatigiinnermik aamma toqqissisimanermik pingaartitsisut

∙Suliniuteqareernermi malinnaaviginninnermi sulianik sammisanillu sunniuteqarsinnaanermut ineriartortitsinermullu periarfissaqarneq

∙Pikkorissarnerit aamma ilinniaqqinnerit aqqutigalugit suliatigut inuttullu ineriartornissamut periarfissat pitsaasut

∙Suliffik, ulluinnarni qanilaartumik, ataqqinnittumik aamma nuannisarnermi suleqataaffigisarput

Pineqaatissinneqarsimannginnermut uppernarsaat:

Atorfik una pineqaatissinneqarsimannginnermut uppernarsaammik pissarsinissamut inatsit naapertorlugu pisussaatitaaffeqarpoq. Inatsit naapertorlugu kommune pineqaatissinneqarsimannginnermut uppernarsaammik pissarsippat atorfinitsitsineq aatsaat pisinnaavoq. Taamaammat maluginiaqqussavarput atorfininnissamut isumaqatigiissusiortoqarsinnaammat kommune pineqaatissinneqarsimannginnermut uppernarsaammik Politiinit aatsaat pissarsereerpat.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami Aqutsisoq Mikael-Erik Larsen, oqarasuaat +299 58 40 63 imaluunniit e-mail: mirl@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 1256-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: decembarip 22.-at, 2025

Atorfik una qinnuteqarfigiuk