Peqqissutsimut inunnullu Innarluutilinnut Naalakkersuisoqarfimmut oqaatsitigut siunnersorti

Aqutsisoqarnermi allatseqarfimmi oqaatsitigut siunnersortimik piginnaasalimmik ujarlerpugut. Oqaatsinik atuilluarsinnaavit immikkuualuttunillu tappiffiginnittuullutit? Taava imaassinnaavoq illiusoq aqutsisoqarnermi allattoqarfimmi suleqatissarput.

Oqaatsitigut siunnersortitut qitiusumik nutserisutut aamma ataqatigiissaareqataanermut inissisimajumaarputit. Suliassatit qanoq pingaartiginersut apeqqutaalluni, kukkunersiuineq, pitsaassutsimik qulakkeerinninneq nutserinerlu suliassaqarfigisassavatit. 

Nutserisooqatigiinnut suleqataalissaatit, taanna oqaatsitigut siunnersortimik ataatsimik aamma nutserisunut/ oqalutsinut siunnersortimik sulisoqarpoq, aammalu immikkoortortaqarfiit assigiinngitsut akimorlugit suleqatit pitsaasut suleqatigisassavatit. Naalakkersuisoqarfimmi suliassat soorlu uku isummernissamut tunngavissiat, nassuiaatit, tusagassiorfinnut nalunaarutit, paasititsiniaanerillu suliarineqartarput.

Suliassatit ilaatigut makkuussapput:

• Nutsigassanik suliaqarneq
• Nutsikkanik kukkunersiuineq oqaaseqatigiinnillu allanngortitserineq
• Nutsikkat pitsaassusaanik qulakkeerineq
• Nutsikkat malittaralugillu ataqatigiissaarineq

Politikkikkut allaffissornikkullu aqutsisunik kiisalu peqqissutsimut aammalu innarluutillit pillugit susassaqarfimmi sulianut immikkoortortaqarfinnik sullissisut taakkunanilu suleqatigiinnut peqataalissaatit. Aqutsisunut allattoqarfimmi pisortaq qullersarissavat.

Sulianut tunngasutigut piginnaasat:

• Nutserisutut, oqalutsitut imaluunniit oqaatsitigut attuumassutilimmik attaveqaqatigiinnermilluunniit tunuliaqutilimmik ilinniagalik
• Atorfimmit imaluunniit suliffeqarfimmit assingusumit misilittagaqarneq iluaqutaassaaq
• MS Officemik atuinissamut tunngaviusumillu aaqqissuussaanermut paasinnissinnaassuseqarneq; TMS-imillu (Translation Management System) misilittagaqarneq iluaqutaassaaq
• Oqaatsitigut Kalaallisut, danskisut - tuluttulluunniit piginnaasaqarneq, oqaatsit taaneqartuni kingulleq piumasaqaataanngilaq

Inuttut piginnaasat:

• Nammineq sulisinnaassaatit pisunilu ulapaarfiusuni tamakkiisumik isiginnissinnaanerit attatiinnarsinnaallugu
• Aaqqissuussamik peqqissaartumillu sulilluarsinnaasutit
• Oqalunnikkut allattariarsornikkullu attaveqatigiinnermik pitsaasunik piginnaasaqarputit.
• Suleqatinut suleqatigisartakkanullu kiffartuussiumassuseqartutit
• Suliartortuaannartuullutit suliassanullu assigiinngitsunut atatillugu tamatigoortuusutit
• Suleqateqallaqqissuusutit suliffeqarfiullu avataanik pitsaasumik pilersitsinissamut tunniussaqarusussuseqartuusutit

Kissaatigaarput, illit:

• Bacheloritut qaffasissusilimmik attuumassutilimmik ilinniagaqartutit.
• Atorfimmut tassunga assingusumit imaluunniit Namminersorlutik Oqartussani atorfimmit misilittagaqassasutit.
• Ataatsimut isiginnittariaatsimik pitsaasumik piginnaasaqartutit ulapaarfimmilu sulisinnaalluartutit.
• Nunatsinni inuiaqatigiinnut kulturimullu ilisimasaqartuusutit, marlunnillu kalaallisut danskisullu oqaaseqartuullutit. 
• Tamakkiisumik isiginnillaqqissuuvutit sulianillu ilungersunartunik tamanillu takunnissinnaassuseqarlutit.

Atorfik pillugu paasisaqarnerorusukkuit allaffeqarfimmi pisortaq Lars Jørgen Petersen oqarasuaammut 345449, imal. mailikkut: ljp@nanoq.gl saaffigisinnaavat

Soqutiginnikkuit ulloq 26. septemberi 2025 nallertinnagu kingusinnerpaamillu qinnuteqaatit CV-talerlugu oqaaseqaatertalerlugulu link ataaniittoq aqqutigalugu nassiuguk.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk