Ukioqatigiinngiiaanut meeqqerivik Nukariit immikkoortortami aqutsisussarsiorpoq

Nukariit paaqqinnittarfik tallimanik meeraaqqerivimmi initalik aamma pingasunik meeqqerivimmi initalik.

Meeqqerivik meeqqanut 120-nut inissaqarpoq.

Sulisut 28-nut amerlassusiligaapput ininilu arfineq pingasuni pingasunngorlugit agguarneqarlutik, igaffimmi ikiortit marluk, "flyver" ataaseq aamma aqutsisoq ataaseq.

Piffissami 07.00 – 17.00-p akornani ammasarpoq.

Meeqqerivimmi siunertaasut:

∙Meeqqat ulluinnarmik toqqissisimanartumik aamma tikilluaqqusaasutut misigissasut

∙Meeqqat ataasiakkaat ineriartornerat ilinniarnerallu immikkut eqqumaffiginiarneqassasoq

∙Meeqqat imminut naleqartinneranik imminullu tatigineranik nukittorsaasoqassasoq

∙Meeqqat alapernaatsut, tatituut, peqqissut nuannaartullu pilersinneqassasut

Naatsorsuutigaarput:

∙Perorsaasutut ilinniarsimanissat

∙Meeqqat ineriartornerannik ilisimasaqartutit

∙Ersarissuussutit, patajaatsoq aamma immikkoortortami aqutsisutut qanilaartuussasutit

∙Suleqatikkuminartutit aamma aqutsisoqatigiinnik suleqateqarsinnaasutit

∙Akisussaaffimmik tigusisinnaasutit namminerlu iliuuseqarsinnaasutit

∙Tamanik takunnissinnaasutit unneqqarissuusutillu

∙Allaffissornermik qarasaasianullu tunngasunik ilisimasaqartutit

∙Akisussaassuseqartuusutit aamma paaqqinnittarfilerinerup iluani misilittagaqartutit

∙Qiimasuusutit pitsaasumillu inuunermik isiginnittaaseqartutit

∙Kalaallisut danskisullu marluinnik oqaaseqartuuguit iluaqutaassaaq kisianni piumasaqaataanngilaq

Atorfiup imarai:

Immikkoortortami aqutsisumik ajornanngippat aqutsinermut tunngasunik misilittagalimmik aamma aqutsisoqatigiit suleqatigalugit suliassanik assigiinngitsunik isumaginnissinnaasumik pissarsiorpugut.

Neqeroorutigivagut:

Paaqqinnittarfik pinngortitamut qanittoq

Ullut assigiinngisitaartut

Allanngorartumik sulisinnaasutit

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Aqutsisoq Lydia Lyberth, oqarasuaat +299 36 69 91 imaluunniit e-mail: lyly@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 227-26-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: marsip 24.-at, 2026