Visit Greenland Head of Destination Developmentissarsiorpoq

Visit Greenlandimi nunap tamarmiusup takornariaqarnikkut ineriartortinneqarnissaa ikorfartugassaraarput – akisussaassuseqartumik ineriartortitsineq, najukkamik aallaaveqarneq aammalu naleqarnerulersitsineq siunnerfigalugit. Takornariaqarnerup Kalaallit Nunaannut naleqarnerulersitsinissaa, aammalu sumiiffikkuutaartumik assigiinngitsuni periarfissat piorsarsimassuserpullu, kiisalu inuit suliffeqarfiillu takornarissanut misigisassarsiortitsisartut aallaavigalugit ineriartortitsisoqarnissaa anguniagaraarput.

Takornariaqarneq sukkasuumik ineriartorpoq. Nunat tamalaat akornanni attaveqaatit soqutiginninnerulernerlu sumiiffikkuutaartuni niuerfinnik, nioqqutissanik, nutaanillu suliffissanik suleqatissanillu periarfissanut nutaanut ammaassivoq. Ilutigitilluguli tikikkuminarneruleriartuinnarnerup ornitassanut qanoq naleqarnerulersinneqarnissaa piumasaqaateqarfiulerpoq.

Qanoq ililluta takornarissat ujartugaat, nunatsinnilu sumiiffinni assigiinngitsuni periarfissat ataqatigiinnerulersissinnaavagut? Takornarissat misigisassaat inisimatitsisuunerillu pitsaasut qanoq tapersersussavagut? Aamma qanoq iliorutta sumiiffikkuutaartuni atugassarititaasut aallaavigalugit ineriartortitsisoqarnissaa, aammalu ungasinnerusoq eqqarsaatigalugu Kalaallit Nunaannut tamarmut naleqalersitsinissaq qulakkeerneqassappat?

Atorfik pillugu

Head of Destination Developmentitut najukkami takornarialerisunut, ornitassanut, niuerfinnilu ujartukkanut kiisalu nunatsinni nunanilu tamalaani suleqatinut ataqatigiilersitsisuullutillu ataatsimoortitsisuussaatit.

Suliassatit tassaapput ilisimasat periarfissallu ineriartortitsinermut, najukkani isumassarsianut naleqquttumut, piviusunngortinnissaat – peqatigitillugulu ornitassani pisariaqartitat periarfissallu nunami tamarmi nunallu tamalaat akornanni sulinermut ilanngutinnissaat. Pisortaq toqqaannartumik qullersarisassavat, aqutsisooqatigiinni ilaassallutit aammalu Destination Development teamimi aqutsinermut akisussaasuussallutit.

Atorfik pingaarutilimmik inissisimaffiussaaq, sammivimmut ingerlatsinermullu piviusumik sunniuteqarnissamut – siunertaqarluartumik periarfissiilluni, suleqatit tunniusimasut peqatigalugit aammalu suliatigut ineriartornissamut periarfissaqarpoq.

Pingaarnertut akisussaaffissatit:

●      Visit Greenlandip periusissiaata 2025-2035-mut atuuttussap tigussaasumik iliuusissatut pilersaarutinngortinnissaa, pingaarnersiorneqarnissaa ornitassanullu ineriartortitsinermut suliaqarnermi atorneqarnissaa akisussaaffigissavat.

●      Periusissiami anguniakkani ukunani akisussaassuseqartumik takornariaqarneq, pitsaassusiliineq najukkamilu naleqarnerulersitsineq ikorfartuutitut ornitassatut ineriartortitassat inerisarnissaat, ingerlanneqarnissaat aammalu malinnaaffiginissaat akisussaaffigissavatit.

●      Ornitassat, takornarialerisut, kommunit, oqartussaasut allallu nunatsinni suliniartut qanimut suleqatigalugit najukkamik aallaaveqarluni suliniutinilu akisussaassuseqartumik suleriuseqarnissap qulakkeerneqarnissaa akisussaaffigissavat.

●      Inuussutissarsiuteqartut ilisimasanik, sakkussanik, niuerfimmik paasisimasaqarnissaannik aammalu piginnaasamikkut ineriartortinneqarnissaannik ikorfartuisoqarnissaa, aammalu Visit Greenlandip B2B-nut B2C-nullu suliniutaasa ataqatigiissuunissaat akisussaaffigissavat.

●      Tusarniaanermi aamma §37-nut akissutissat suliarineqarnissaat kiisalu akiliisitsilluni aallaaniartitsinermi aamma piniartitsinissamut nunap immikkoortuini akuersissummik qinnuteqarnerit akisussaaffigissavatit.

●      Nunatsinni nunanilu tamalaani saqqummersitsivinni, ataatsimeersuarnerni workshoppinilu naleqquttuni Visit Greenland sinniisuuffigisarnissaa akisussaaffigissavat.

●      Destination Development team aqutsisutut akisussaasuuffigissavat, aammalu sammiviup ersarissuunissaa, pingaarnersiuinissaq, siuariartornissaq sulisullu akisussaaffimmik tigusisinnaanissaannut inissaqartitsinissaq akisussaaffigissavat.

Illit pillutit

Aqutsisutut misilittagaqarnermik Kalaallillu Nunaat pillugu patajaatsumik ilisimasaqarnermik ilaqartumik takornariaqarnerup, hospitalityp inuussutissarsiuteqarnerulluunniit iluani naleqquttumik ilinniagaqarnissat takorloorparput.

Taakku saniatigut piginnaasat uku pingaartilluinnagaraagut

Suliassanut piginnaasat

●      Kalaallisut, danskisut tuluttullu attaveqarluarsinnaasuussaatit.

●      Takornariaqarnermi misilittagaqassaatit aammalu Kalaallit Nunaanni inuiaqatigiinnik piorsarsimassutsimillu ilisimasaqarluartuussaatit.

●      Suliniutinik ingerlatsinermut suleriutsinillu aqutsinermut piginnaasaqarluartuussaatit aaqqissuussaanermut, atuutilersitsinermut malinnaaffiginninnermullu ukkatarinnissinnaasuullutit.

●      Periusissiornikkut ungasinnerusoq eqqarsaatigalugu eqqarsarsinnaassaatit, periusissiamilu tigussaasumik pingaarnersiuininngortitsillutillu iliuusissanngortitsisinnaasuussallutit.

●      Takornarissap angalanerata tamarmiusup ingerlarngata aammalu niuerfinnut, paasissutissiinernut, nioqqutinut, sullissinermut misigisassanullu ataqatigiissusaat paasisinnaassavat.

●      Soqutigisaqaqatigiinnik attaveqaqateqarnermut suleqatigiilersitsinissamullu piginnaasaqarluartuussaatit (stakeholder management) aammalu najukkami, nunatsinni nunallu tamalaat akornanni takornarialerisunik suleqatigiissitsinernik pilersitsisinnaallutit.

●      Oqariartuuteqarluarsinnaasuussaatit aammalu workshoppini, ataatsimeersuarnerni saqqummersitsinerni attaveqaqatigiiffinnilu naleqquttuni suliannut pikkorissuseqarluartumik tunniusimallutit Visit Greenland sinniisuuffigisinnaassallugu.

Inuttut nukittuffitit

●      Siumungaaq isiginnittaaseqarlutit iliuuseqartarputit, akisussaaffimmik tigusisinnaallutit isumassarsiallu aalajangiussat ilanngullugit iliuusinngortissinnaallugit.

●      Suliffeqarfimmi sukkasuumik allanngorartumiinneq ilorrisimaannaraat, sammiviit ataatsimullu isiginnissinnaassutsit annaanngikkaluarlugu periarfissat pingaarnersiuinerillu allanngorsinnaaffianni ingerlalluarsinnaallutit.

●      Alapernaatsuuvutit, attaveqaqateqallaqqissuullutit aammalu inuit allat inissisimaffiannut imminut inississinnaallutit.

●      Siuariartornermik pilersitsisuullutit aqutsisuuvutit sulerusussusilik, sulisullu akisussaaffimminnik tigusinissaanut inissaqartitsisuullutit.

●      Aaqqissuussaasumik namminersorlutit sulisarputit, Kalaallillu Nunaanni takornariaqarnerup ineriartortinneqarneranut sunniuteqarnissannut kajumissuseqarlutit.

Atorfimmut ima qinnuteqassaatit

Nuummi Visit Greenlandip allaffiani suliffik inissisimavoq. Atorfik Kalaallit Nunaanni nunallu tamalaat akornanni angalaffiusassaaq.

Piginnaasat misilittakkallu tunngavigalugit, akissarsiat atorfinitsitaanermilu atugassarititaasut isumaqatigiissutigineqassapput.

2026-mi oktoberimi atorfinitsitsinissaq kissaatigaarput - kisiannili atorfinittussaq eqqortoq utaqqeqqaarusupparput.

Qinnuteqaatit ataavartumik nalilersorneqassapput, taamaammat piaarnerpaamik qinnuteqaatit pisortamut Linda Kleistimut linda@visitgreenland.com-mut nassiussinnaavat.

Apeqqutissaqarpit?

Linda Kleist linda@visitgreenland.com-mut allaffigiuk

Visit Greenland pillugu

Visit Greenland tassaavoq Kalaallit Nunaata takornariaqarnikkut siunnersuisoqarfia,

tamakkiisumik Namminersorlutik Oqartussanit pigineqartoq. Nunat tamalaat aammalu

Kalaallit Nunaanniittut Visit Greenlandip soqutigisaqaqatigiivi suleqatigalugit, aammalu

pilerisaarinerit tuniniaavissanillu ineriartortitsinerit aqqutigalugit Visit Greenlandip Kalaallit

Nunaat, ornitassatut nuna nunallu isikkua pillugu ilisimasassarsiorluni takornariagassatut,

nittarsaattarpaa.

Suliniaqatigiiffik pillugu paasisaqarnerugit paasisaqarnerugit uani.