Washington D.C.-mi Kalaallit Nunaata USA-mi aamma Canadami sinniisoqarfia allaffimmi assistentimik pissarsiorpoq

Atorfik: Allaffimmi ikiorti

Atofiup sivisussusaa: USA-mi atorfeqarnermi atugassaritinneqartut malillugit ukiuni pingasuni piffissaq tamakkerlugu atorfeqarneq, sivitsuinissaq periarfissaavoq

Ulloq aallartiffik: 1. april 2026 sukkanerpaamilluunniit

Sumiiffik: Kalaallit Nunaata Sinniisoqarfia, 3200 Whitehaven St. N.W., Washington D.C. 20008, USA

Qinnuteqarnissamut

piffissap killinga: 4. marts, 2026

Washington D.C.-mi Kalaallit Nunaata sinniisoqarfia allaffimmi assistentimik piffissaq tamakkerlugu atorfeqartussamik suleqatigiinnut tassaanut diplomatit marluk, politikkikkut siunnersorti ataaseq aamma ilinniarnermut atatillugu suliffimmiittoq ataaseq, allaffimmi ulluinnarni suliassanik suliaqartussamik pissarsiorpoq.

Kalaallit Nunaata Sinniisoqarfia septembari 2014-imi ammarpoq aammalu Danmarkip Washington D.C.-mi ambassadeani inissisimalluni. Siunertaq pingaarneq suliassallu tassaapput Kalaallit Nunaata USA-mi Canadamilu soqutigisaata siuarsarnissaat, immikkoortuni assigiinngitsuni atassuteqaatit annertusarnissaat Amerikap Avannaani niuerfinni niuernermi soqutigisat annertusarnissat aamma Kalaallit Nunaata Amerikap Avannaani ataatsimut isigalugu soqutigisaanik pitsaasumik takkulliunneq.

Suliassat pingaarnerit akisussaaffiillu

Suliassat pingaarnerit tassaapput allaffissornermi ulluinnarni suliassat, tassa allaffimmi naatsorsuutit, peqatigitillugulu ulluinnarni suliassanut, aaqqissuinernut, tikeraarnernut, ataatsimiinnernut suliassanullu allanut atatillugu suleqatigiinnut tapersiisarneq.

Piginnaasat

Ilimagaarput naatsorsuusiornermik allaffimmilu suliassanik misilittagaqartutit. Sullissiumasuuvutit suliassanullu assigiinngitsunut akisussaassuseqarneq pingaartikkit. Aaqqissuussamik sulisinnaavutit suliassannillu pilersaarusiorluarsinnaavutit tulleriiaarilluarsinnaallutillu. Malittarisassanik suleriaatsinillu paasinnilluarsinnaavutit tamakkulu malillugit iliuuseqarsinnaallutit. Inuppalaartuuvutit suleqateqarsinnaallutillu. Atorfimmi Danmarkip Ambassadeani nunallu allat aallartitaqarfianni sulisunik suleqateqartoqartarpoq. Tuluttut oqalussinnaaneq piumasaqaataavoq. Kalaallit oqaasiinik aamma/imaluunniit skandinaviamiut oqaasiinik ilisimasaqarneq iluaqutaassaaq piumasaqaataananili. Sulinermi nalinginnaasumik ammasarfik malinneqarpoq. Kisianni tamatigoortuuneq piffissani ulapaarfiusuni piumasaqaataavoq, piffissallu ammasarfiup avataani sulinissat pisariaqartinneqartassaaq, assersuutigalugu ministerimik tikeraartoqarnermi aaqqissuussinernilu allani.

Atorfeqarnermi atugassarititat

• Ukiuni pingasuni piffissaq tamakkerlugu atorfeqarnissannik neqeroorfigineqassaatit, sumiiffimmilu Ambassademi sulisut pillugit malittarisassat tunngavigalugu isumaqatigiissuteqarnikkut sivitsorneqarsinnaalluni.

• Sapaatip akunneranut nalinginnaasumik suliffik tassaavoq tiimit 37-t

• Ukiumut ullut 25-t akissarsiaqarlutit sulinngiffeqarsinnaatitaassaatit

• Akissarsianni piginnaasatit, misilittakkatit atorfimmut attuumassuteqartut sulinermilu angusat uppernarsarneqarsinnaasut malinneqassapput.

• Sumiiffimmi peqqinnissamut sillimmasiissummik neqeroorutigineqassaatit, ilaatigut 20%-mik nammineq sillimmasiissummik akiliisoqarluni.

• Tapiissutit piumasaqaatillu allat Ambassadep sulisunik malittarisassai tunngavigalugit pissapput.

• Atorfimmut aammalu naligisaanik piginnaasaqartumut misilittagaqartumullu attuumassuteqartut – sulisumut USA-mi akileraaruteqartartumut – qaammammut akissarsiaq tunngaviusoq tassaavoq 4.236 USD. Akileraaruteqanngitsumik sulisumut (USA-mi visa-mik inissisimaneq innuttaassuseqarnerlu apeqqutaatillugit) qaammammut akissarsiaq netto-mik tassaassaaq 3.515 USD. Tunngaviusumik akissarsiaq allanngortinneqarsinnaavoq, qinnuteqartoq atorfimmut pisariaqartinneqartunik piginnaasaqanngippat. Qinnuteqartup piginnaasassai misilittagaalu apeqqutaatillugit ataasiakkaanut tapiissuteqartoqarsinnaavoq.

Qinnuteqarneq atorfinitsitsiniarnerlu

Qinnuigineqarputit qinnuteqaatit (qinnuteqaat, CV, innersuussinerit) tuluttut politikkikkut siunnersortimut Marie Jensen Suersaq uunga aajs@nanoq.gl nalunaaqutserlugu “Allaffimmi assistenti – Kalaallit Nunaat”, kingusinnerpaamik 2. marts 2026 nassiuteqqullugu.

Sinniisoqarfiup tamanut assigiimmik periarfissiinissaq pingaartippaa, taamaammallu inunnit piginnaasaqartunit tamanit qinnuteqaammik, race, suiaassuseq, upperisaq, ukiut innarluuteqarnerluunniit apeqqutaatinnagit tiguserusulluni.

Qinnuteqartut toqqarneqartut oqaloqatigiinnissamut aggersarneqassapput.

Qinnuteqartoq toqqarneqartoq pinerluuteqarsimannginnermik uppernarsaammik takutitsisinnaassaaq atorfininnginnermilu Danmarki oqartussanit isumannaallisaanermi akuerineqassalluni.

Apeqqutit

Atorfik pillugu apeqqutissaqaruit qinnuigineqarputit politikkikkut siunnersorti Marie Jensen Suersaq aajs@nanoq.gl attaveqarfigeqqullugu.

Najugaq

Atorfimmut atatillugu sulisunut inissiamik innersuussisoqarsinnaanngilaq.

Uagut pilluta

Kalaallit Nunaata USA-mi Canadamilu Aallartitaqarfia Kalaallit Nunaata nunani allani aallartitaqarfiisa pingaarnerit ilagaat, pisortatigoortumillu nunanut allanut attaveqaatitut atuulluni, Kalaallit Nunaat Amerikap Avannaani naalakkersuisunut sinniisuuffigalugu. Sinniisoqarfik Washington D.C.-mi qitiusumik allaffeqarpoq, Kalaallit Nunaata USA-mut Canadamullu politikkikkut, aningaasaqarnikkut, kulturikkut ilisimatusarnermilu atassuteqarnerata annertusarnissaanik akisussaasuulluni aqutsillunilu.

Suliassagut tassaapput Kalaallit Nunaata nunani allani soqutigisaanik siuarsaanissaq, paaseqatigiinnerup annertusarnissaa aamma immikkoortuni soorlu niuernermi aningaasaliinernilu, issittumi pissutsini, nunap inoqqaavinut atassuteqarnermi, silap pissusaani avatangiisinilu, ilinniartitaanermi, nukissiuuteqarnermi takornariaqarnermilu suleqatigiinnerup siuarsarnissaa.

Kalaallit Nunaata Washington D.C.-mi Aallartitaqarfia pillugu paasissutissat annertunerusut uani takuneqarsinnaapput https://naalakkersuisut.gl

Sinniisoqarfiup ukua suliniutigai:

• Kalaallit Nunaat USA-mi Canadamilu saqquninissaata periusissiornermilu soqutigisaata siuarsarnissaa

• Politikkikkut qaffasissumik oqaloqatigiinnerit, ministerit tikeraarnerisa suliaqarfiillu suleqatigiinnerisa piuminarsarnissaat

• Kalaallit Nunaata kulturikkut naleqatitagigullu aaqqissuussinikkut attaveqartarnikkullu takoqqusaarutiginissaa

• Kalaallit Nunaata issittumi isumannaallisaanermi, imminut nappassinnaanermi naalakkersuinikkullu suleqateqarneranik tapersiineq

• Ineriartornerit Kalaallit Nunaata pingaarnersiuineranut tunngasut pillugit politikkikkut siunnersuisarneq nalunaaruteqartarnerlu

Suleqatigiit ikitsuuvugut, kisianni anguniagaqartut, sukkasuumik sulisartut suleqatigiinnermillu pingaartitsisut. Sullivimmi avatangiisitsinni suliassat assigiinngitsuupput tamatigoortuunermik, suliniuteqartarnermik akisussaassuseqarluarnermillu pisariaqartitsiviusut. Sinniisoqarfik Kalaallit Nunaata nunat tamat akornanni, pingaartumik Amerikap Avannaani Issittumilu peqataanera annertusiartortillugu, oqaloqatigiinnerup isikkulersornerani killeqarfiillu akimorlugit piffissamut sivisuumut peqateqaleriartornerani pingaaruteqarneruleriartorpoq.

Kalaallit Nunaata nunat tamat akornanni peqataanerata annertusarnerani peqatigisisut peqataagillu

Suleqatigiinni suliniuteqarluartuni, tunniusimasuni allannguinissamullu piareersimasuni tikilluaqqunissat qilaanaaraarput.

Qinnuteqaat nassiuguk