Fuldmægtigit/siunnersortit aningaasaqarnikkut politikimik pisortanilu aningaasaqarnermik aqutsinermik ilisimasaqarluartut

Fuldmægtigit/siunnersortit aningaasaqarnikkut politikimik pisortanilu aningaasaqarnermik aqutsinermik ilisimasaqarluartut

Kalaallit Nunaata aningaasaqarnera siunissaalu pillugit naalakkersuinikkut aalajangiinissanut isumaqatiginninniarnissanut tunngavissanik suliaqarusuppit?Misissueqqissaartarnerit nukittuffigaagit, alapernaatsuullutit naalakkersuisoqarfimmilu suleqatigiinnerup ilinniarsimasanillu ingerlatsinerup ataatsimoornerullu ingiaqatigiiffigisaanni politikikkut piviusumut qanittumi sulerusuppit? Sulianik ajornakusoortunik isumaginnillaqqissuuit suliallu pingaarnertut imarisaannik ersarissumik paasiuminartumillu ingerlatitseqqillaqqissuuit? Taamaassimappat immaqa tassaavutit Aningaasaqarnermik pilersaarusiornermut immikkoortortaqarfimmi suleqatitaasarput.

Atorfik pillugu

Kalaallit Nunaata nunarsuarmi allanngorarfiusumi inissisimanera aatsaat taama pingaaruteqartigilerpoq. Aningaasaqarnermut Akileraartarnermullu Naalakkersuisoqarfimmi sulisutut aningaasaqarnikkut pilersaarusiornermi nunatsinnilu inuiaqatigiit ineriartorneranni qitiusumik suliaqarfimmut ilaalissaatit.

Suleqatigiinnit ikorfartorneqarlutit peqatigineqarlutillu siunissami qaninnermi ungasinnerusumilu piujuartitsisumik aningaasalersuisarnermut politikimik qulakkeerinneqataassaatit. Suleqatitit naalakkersuisoqarfiillu allat kommunillu qanimut oqaloqatigalugit, nunatta aningaasaqarnerata sinaakkutaasa iluanni Namminersorlutik Oqartussat kommunillu pitsaanerpaamik ingerlanneqarnerannik qulakkeerinnillutillu ineriartortitsinermut akisussaaffeqassaatit. Tamatuma kommunit aningaasaqarnerannik pilersaarusiukkamik suliarinissaanut immikkuullarissumik periarfississavaatit, pisortallu aningaasaataannik peqqinniartumik akisussaassusilimmillu ingerlatsinermut ilapittuissaatit.

Tamatuma saniatigut suleqatitit qanimut suleqatigalugit aningaasanut inatsimmik suliaqarneq aqqutigalugu pisortat ingerlatsiviini aningaasaqarnermut sinaakkutissanik pingaarnernik aaqqissuusseqataallutillu aqutseqataassaatit. Taamatuttaaq assersuutigalugu inuiaqatigiit aningaasaqarnerannut kinguneqaatissat pillugit naatsorsuinerit, sullississutinik tapiissutitullu aaqqissuussinernik nalilersuinerit, akileraartarnermut inatsisip allannguutai il.il. pillugit misissueqqissaarnermi immikkut suliniutit pillugit suleqatigiinnerni ingerlaavartumik peqataassaatit.

Suliassatit

Piginnaasatit ilinniakkatillu apeqqutaatillugit naalakkersuisoqarfiup suliassarpassuisa iluini peqataatinneqassaatit aammalu piginnaasanik ineriartortitsinissamut periarfissinneqassallutit. Suliassatit assersuutigalugu makkuusinnaassapput:

• Kommunit Namminersorlutillu Oqartussat aningaasaqarnerat pillugu ingerlaavartumik nalunaarusiortarnissamut nakkutilliinermi atortussanik ineriartortitsineq.

• Namminersorlutik Oqartussat immikkoortortaqarfiini suliassaqarfiinilu aningaasartuutinik misissueqqissaarinernik suliaqarneq.

• Missingersuutinik naatsorsuutinillu malitseqartitsisarnikkut aningaasartuutinik ingerlaavartumik nakkutilliineq.

• Aningaasaqarnermik aqutsineq missingersuutinillu sippuinnginnissaq pillugu kommuninik Namminersorlutillu Oqartussat immikkoortortaqarfiinik siunnersuineq.

• Inatsisiliornerit naalakkersuinikkullu suliniuteqarnerit inuiaqatigiit aningaasaqarnerannut kingunerisassaannik nalilersuineq.

• Naalakkersuisup Naalakkersuisullu isummernissaannut tunngavissiorneq allakkatigullu atortussanik allanik suliaqarneq

• Aningaasaqarnikkut misissoqqissaakkanik tamanullu saqqummersitassanik suliaqarneq.

Illit pillutit

Pingaartipparput:

• Inuiaqatigiilerinermik kandidatitut naleqquttumik ilinniagaqarnissat (assersuutigalugu aningaasaqarnermik ilisimatooq, inuussutissarsiornikkut aningaasaqarnermik ilisimatooq, naalagaaffiit pissusiinik ilisimatooq assigisaalluunniit)

• Ajornartorsiutinik ajornakusoortunik erseqqissumik paasiuminartumillu – oqalunnikkut allakkatigullu - sulissutiginnissinnaanissat.

• Inuiaqatigiit aningaasaqarneranni periutsinik ilisimasaqarluartuunissat aammalu misissueqqissaarnikkut pitsaasunik piginnaasaqarnissat (aningaasaqarnikkut naatsorsuinikkullu programinik, assersuutigalugu Prismemik, ilisimasaqarnissaq iluaqutaassaaq).

• Nutaanik ilisimasaqalertorsinnaanissat aammalu sulianik ilisimasaqarluarlutit naammassisaqarnissamik pingaartitsisuunissat.

• Naalakkersuinermik suliaqartunik qanimut suleqateqarnissamik soqutiginnittuunissat.

• Kalaallit Nunaanni inuiaqatigiinnik aammalu Kalaallit Nunaanni inuiaqatigiinni pissutsinik ilisimasaqarnissat, tamannalu iluaqutaasussatut isigineqarluni.

Naalakkersuisoqarfik suliffeqarfittut

Aningaasaqarnermut Akileraartarnermullu Naalakkersuisoqarfik Naalakkersuisut aningaasaqarnikkut ingerlatsinermi suliaannik aammalu aningaasaqarnermi politikikkut aalajangigassaannik ataqatigiissaarisuuvoq. Tamatumunnga ilaatigut ilaapput ukiumoortumik aningasanut inatsimmik suliaqarneq, tassaasoq Namminersorlutik Oqartussat aningaasartuutissaannut isertitassaannullu missingersuut.

Naalakkersuisut aningaasaqarnikkut politikimik attanneqarsinnaasumik inerikkiartornermut, naammassisaqarsinnaassutsimut atugarissaarnermullu nukittorsaataasumik aammalu siunissaq qaninnerusoq isigalugu aningaasaqarnermik akisussaassuseqartumik aqutsineq aqqutigalugu siunissarlu ungasinnerusoq isigalugu aaqqissuussaanikkut attassiniarnermi unammilligassanik suussusersiniarnikkut pisortat ingerlatsiviisa sunniuteqarluartumik ingerlanneqarnerannut ikorfartuutaasumik ingerlatsinissamut sapinngisamik pitsaanerpaanik tunngavissaqartinnissaat suliassaraarput. Suliassagut assigiinngitsorpassuupput, sukkasuumik sunniuteqarluartumillu aalajangiisarpugut naalakkersuinermillu suliaqartut qanimut suleqatigalugit. Taamaattumillu Aningaasaqarnermut Akileraartarnermullu Naalakkersuisoqarfimmi suliffik naalakkersuinikkut aalajangiinissamut tunngavissiornermut atatillugu annertuumik sunniuteqarfiusinnaallunilu akisussaaffeqarfiuvoq.

Naalakkersuisoqarfiup Aningaasaqarnermik pilersaarusiornermut immikkoortortaqarfiani sulissaatit aammalu Inatsisilerinermut Nunalu tamakkerlugu pilersaarusiornermut immikkoortortaqarfik qanimut suliatigullu suleqatigissallugu. Tamatuma saniatigut immikkoortortaqarfiup Akileraartarnermut Aqutsisoqarfik, Aningaasaqarnermut Sulisoqarnermullu Aqutsisoqarfik kiisalu Naatsorsueqqissaartarfik naalakkersuisoqarfiup ataani immikkoortortaasut suleqatigai.

Akissarsiat atorfeqartitaanermilu atugassarititaasut

Kalaallit Nunaanni Namminersorlutik Oqartussat kattuffiullu susassaqartup akornanni isumaqatigiissut malillugu atorfinitsinneqassaatit aammalu qanoq sivisutigisumik sulisimanerit pillugu uppernarsaatitit piginnaasatillu tunngavigalugit fuldmægtigitut imaluunniit immikkut siunnersortitut/siunnersortit pisortaattut inissinneqassallutit.

Naalagaaffimmi atorfillit – isumaqatigiissut malillugu – Kalaallit Nunaanni Namminersorlutik Oqartussani atorfinitsinneqarnermut atatillugu akissarsiaqarnatik sulinngiffeqarsinnaatitaapput. Aammattaaq Kalaallit Nunaanni Namminersorlutik Oqartussani atorfinitsinneqarnermi akissarsiaqarnani sulinngiffeqarnissamik qinnuteqaatinut akuersaaqqullugit kommunit nunallu immikkoortui naalagaaffimmit kaammattorneqarsimapput. Sulinngiffeqarneq pillugu aalajangersakkanut ilaapput katissimallugu aapparisaq imaluunniit inuit Kalaallit Nunaanni Namminersorlutik Oqartussani atorfinitsinneqartut inooqatigisaat.

Oqaloqatigineqassaguit tamatumunnga atatillugu apeqqutinik suliamut attuumassutilinnik imalimmik allattariarsornikkut misilitsinnissat piareersimaffigissavat.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.

Paasissutissat annertunerusut

Atorfik pillugu annertunerusumik paasisaqarusukkuit immikkoortortaqarfimmi pisortamut Michael Pedersenimut, oqarasuaat +299 346928 / e-mail micp@nanoq.gl imaluunniit allaffimmi pisortamut Jeppe Købke Ørumimut, oqarasuaat +299 288882 / e-mail jepk@nanoq.gl saaffiginninnissannut tikilluaqqusaavutit.

Qinnuteqaat

Qinnuteqaativit suliffigisimasatit pillugit paasissutissartallip, soraarummeersimanermut uppernarsaatitallip, tassunga ilanngullugu karakteerit assilinerinik ilallip immaqalu ilanngussartallip tuugassaq una aqqutigalugu “qinnuteqaat nassiuguk” kingusinnerpaamik ulloq 7. juli 2025-mi tigunissaa qilanaaraarput.

Ingerlaavartumik oqaloqateqartarnissarput naatsorsuutigaarput aammalu suleqatissarput nutaaq sapinngisamik piaartumik imaluunniit piffissaq ilinnut naalakkersuisoqarfimmullu naleqqunnerpaaq eqqumaffigalugu isumaqatigiissuteqartoq malillugu tikilluaqqusinnaanissat neriuutigalutigu.

Aningaasaqarnermut Akileraartarnermullu Naalakkersuisoqarfiup assigiinngiiaassuseq nukittoqutitut isigaa aammalu ilinniagartuut soqutiginnittut tamaasa inuttut tunuliaqutit apeqqutaatinnagit qinnuteqarnissamut kaammattorlugit. Qinnuteqaativit atuarnissaa qilanaaraarput.

Qinnuteqaat nassiuguk