Sanaartornermut Immikkoortortaqarfimmi AC-fuldmægtigi

Sanaartornermut Immikkoortortaqarfimmi AC-fuldmægtigi

Atorfik pillugu

Politikkikkut aalajangiisarnerit qanillugit sulerusuppit, aammalu Naalakkersuisut anguniagaasa suliniutinut aalajangersimasunut nuunneqartarnerinut suleqataarusuppit? Ulluinnarni suliassanik, attaveqaqatigiinnermiit periusissiornermi, misissueqqissaarnermi akimuillunilu ataqatigiissaarinermi politikkikkut kiffartuussinermut suliaqarfiusunut suleqataanissat nuannaraajuk? Taamaappat immaqa illit Sanaartornermut Immikkoortortaqarfimmi AC-fuldmægtigitut suleqatigilersinnaavatsigit.

AC-fuldmægtigitut Sanaartornermut Immikkoortortaqarfimmi suliassaqarfiit akimorlugit suliassat isumagineqarnerini suleqataalissaatit, aammalu Naalakkersuisumut, aqutsisunut immikkoortortaqarfimmilu suliassaqarfinnut tapertaasarnermi qitiusumik inissisimalissallutit. Sanaartornermut Immikkoortortaqarfiup akisussaaffeqarfiini suliassat assigiinngitsorpassuit suliarisassavatit – attaveqaqatigiinnermiit periusissiornermi, misissueqqissaarnermi akimuillunilu ataqatigiissaarinermi politikkikkut kiffartuussinermut suliaqarfiusunut. Ullut assigiinngittuaannarput, aammalu politikkikkut tulleriiaarinerit malillugit suliassat ineriartortarput.

Atorfimmi suliassat assigiinngitsuupput tamatigoortuullutillu, taamaattumillu nammineerluni suliassat aammalu immikkoortortaqarfimmi suliassaqarfiit akimorlugit suleqatit qanittumik suleqatigalugit, aammalu pisariaqartillugu Naalakkersuisoqarfimmi immikkoortortaqarfiit allat suleqatigalugit isumagineqartussaapput. Ulluinnaat tamatigoortunik naapitsiffiusartut, sulianik sivisuumik suliarineqartussanik, taamatullu piaartumik iliuuseqarnissamik ataqatigiissaarinissamillu pisariaqartitsiffiusut isumagisassavatit.

Suliassatit pingaarnerit tassaapput

Suliassatit ilaatigut tassaassapput:

• Aalajangiinissamut tunngavissianik, allakkianik, misissueqqissaarnernik aamma Naalakkersuisunut Inatsisartunullu akissuteqaatinik suliaqartarneq.

• Tusarniaassutinik ataqatigiissaarisarneq aamma Inatsisartut ataatsimiinnerinut atatillugu allagaatit pillugit ikiuuttarneq.

• Periusissianik, iliuusissanut pilersaarutinik aammalu suliassaqarfiit akimorlugit ineriartortitsinermi sulianik allanik suliaqarnermi ikiuuttarneq.

• Sanaartornermut Immikkoortortaqarfimmi suliassaqarfiit akimorlugit allakkiat pitsaassusiinik qulakkeerisarneq ataqatigiissaarisarnerlu.

• Tusagassiorfinnut nalunaarutinik, oqalugiaatissat immikkoortuinik, najoqqutassanut tunngavissanik aammalu Naalakkersuisumut Naalakkersuisoqarfimmullu attaveqaqateqarnermi najoqqutassanik allanik suliaqarneq.

• Naalakkersuisoqarfinnut allanut, kommuninut, ingerlatseqatigiiffinnut suleqatinullu allanut sulianik akimuiffiusunik ataqatigiissaarisarneq suleqateqarnerlu.

• Sanaartornermut Immikkoortortaqarfiup suliassanik isumaginninneranut atatillugu suliassaalersut

Ilinnut tunngasut

Eqqarsaatigaarput ilinniagartuutut attuumassutilimmik ilinniagaqarsimassasutit. Ilinniartitaanikkut tunuliaqutatit misissueqqissaarnermut, ingerlatitseqqinnermut aammalu apeqqutit pisariusut najoqqutassat ersarissut siunnerfeqartullu atorlugit suliarisinnaanerinut piginnaaneqarfinnit pingaannginnerupput. Assersuutigalugu attaveqaqatigiinnermut, tusagassiornermut inuiaqatigiillu pillugit ilisimatusarnermut cand.scient.pol.-itut, cand.scient.adm.-itut, cand.mag.-itut ilinniagaqarsinnaavutit, imaluunniit ilinniagartuutut assingusumik ilinniagaqarsinnaallutit. Aaqqissuussaanermi politikkikkut aqunneqartumi imaluunniit pisortat aqutsivianni misilittagaqarneq iluaqutaassaaq, tamannali piumasaqaataanngilluinnarpoq.

Pingaarutilittut pingaartipparput:

• ersarissumik, eqqortumik paasiuminartumillu allassinnaassasutut – aamma sammisat pisariusut pillugit,

• misissueqqissaarneq nukittuffigissagit, aammalu suliani apeqqutinik aalajangiinissamut tunngavissiamut nuussisinnaaneq piginnaaneqarfigissagit,

• namminersorlutit sulisinnaassasutit, tamatumalu peqatigisaanik suleqatit aqutsisullu qanillugit suleqatigisinnaassagitit,

• nassaarsiortuussasutit, eqaatsumik aaqqiisinnaassasutit paasititsinissamullu piginnaaneqarluassasutit,

• Politikkit, aqutsinerup attaveqaqatigiinnerullu ataqatigiinnerinut soqutiginnittuussasutit.

Neqeroorutigaavut

• Atorfik pissanganartoq isumalillu, inuiaqatigiinnut isumaqarluartoq.

• Politikkikkut aalajangiisarnerit qanillugit atorfik tamatigoortoq, Naalakkersuisoqarfiup akisussaaffii akimorlugit sulinissamut periarfissaqarfiusoq.

• Qitiusumik politikkikkut suliniutit periusissiorlunilu suliniutit ineriartornerinut sunniinissamut periarfissat.

• Sullivimmi avatangiisit ammasut pingaartorsiorfiunngitsullu, tunniusimasunik suleqateqarfiusut.

• Piginnaaneqarfinnik ineriartortitsinissamut, suliani suleqatigiinnissamut namminersorlunilu akisussaaffeqarnissamut periarfissat pitsaasut.

• Sullivimmi ilaqutariittullu inuunermi eqaatsumik ataqqinnittumillu oqimaaqatigiissitsisinnaaneq.

Akissarsiat atorfeqarnermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Atorfiup 1. septembari 2026-mi imaluunniit isumaqatigiissuteqarnikkut inuttalerneqarnissaa kissaatigineqarpoq.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Apeqqutit qinnuteqaallu

Atorfik pillugu apeqqutissaqaruit Immikkoortortaqarfimmi pisortaq Embla Kristjánsdóttir emki@nanoq.gl aqqutigalugu attaveqarfigisinnaavat.

Sanaartornermut Immikkoortortaqarfik pillugu

Sanaartornermut Immikkoortortaqarfik Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmi immikkoortortaqarfiit sisamaasut ilagaat, tassanilu suliassat annertuut inuiaqatigiinnullu pingaarutillit amerlapput. Suliniutit, Naalakkersuisut politikkikkut anguniagaannut tapertaasut, aammalu innuttaasunut inuiaqatigiinnullu naleqalersitsisut ineriartortinneqarneri, pilersaarusiorneqarneri, aningaasalersorneqarneri ingerlanneqarnerilu suliaraagut.

Immikkoortortaqarfimmi Namminersorlutik Oqartussat sanaartugaanni nutaani qitiusumik illuutinut oqartussaasuuneq aamma qitiusumik sanatitsisutut inissisimaneq isumagineqarput. Tamatuma saniatigut Ineqarnermut Illuuteqarnermullu suliassaqarfik, Isorliunerusunut suliassaqarfik, Namminersorlutik Oqartussat sillimmasiissutaat, kiisalu avataaniit aningaasaateqarfiit aningaasalersuisarnerinik ineriartortitsineq ataqatigiissaarinerlu akisussaaffigaagut.

Suliagut inatsisiniit, periusissiorluni ineriartortitsinermiit aaqqissuusseqqinnermiillu oqartussaasut suliaannut, aqutsinermut, aningaasalersueriaatsinut aamma ineriartortitsinerit sanaartornerillu annerusut suliarineqarnerinut tunngasuupput. Taakku saniatigut Naalakkersuisoqarfimmi aningaasaqarneq pillugu suliat, kiisalu Namminersorlutik Oqartussani oqartussaaffiit akimorlugit sanaartornermut aningaasaliissutinik aqutsineq akisussaaffigaagut.

Sulinerput suliatigut piginnaaneqarfiulluartumik, suliassaqarfiit akimorlugit suleqatigiiffiusumik politikerinullu qanittumik attaveqarfiusumik ingerlapparput. Politikkikkut siunnerfiit ineriartortitsineq, inatsisit, aningaasaliissutit suliallu, inuiaqatigiinni piujuartitsinermut ingerlalluarnissamullu tapertaasut aqqutigalugit aaqqiissutissanik aalajangersimasunik inerneqartittarpagut.